Një ngjarje e rëndë ka tronditur Kosovën dhe Shqipërinë, pasi dy të rinj nga Kosova humbën jetën tragjikisht në plazhin e Ranës së Hedhun në Shëngjin.
Viktimat janë Leonit Aliu, 21 vjeç, dhe Jetmir Binaku, 22 vjeç, të cilët ditën e mërkurë kishin hyrë në det për t’u larë së bashku me tre bashkëmoshatarë të tjerë. Sipas informacioneve paraprake, grupi u përball me një rrymë të fortë detare që i mori përpara, duke shkaktuar tragjedinë.
Pavarësisht përpjekjeve për t’i nxjerrë dhe për t’u ardhur në ndihmë, Leonit Aliu dhe Jetmir Binaku nuk arritën të mbijetonin. Ndërkohë, tre të rinjtë e tjerë që ndodheshin me ta mbetën të lënduar dhe morën ndihmën e nevojshme mjekësore.
Leonit Aliu ishte i njohur edhe në sport, pasi në të kaluarën kishte qenë pjesë e ekipit të futbollit KF Fushë Kosova. Ndërsa Jetmir Binaku ishte me origjinë nga fshati Gllobar i Drenasit.
Kjo ngjarje e rëndë ka tronditur familjarët, miqtë dhe mbarë opinionin publik, duke lënë pas dhimbje të madhe në të dyja anët e kufirit.
