Shtatëmbëdhjetë emigrantë dyshohet se kanë humbur jetën gjatë përpjekjes për të arritur me varkë në Ishujt Balearikë të Spanjës, pasi mjeti lundrues me të cilin udhëtonin mbeti në det për rreth 15 ditë. Dy të mbijetuar, të shpëtuar pranë ishullit të Majorkës, u thanë autoriteteve se në bord ndodheshin fillimisht 19 persona dhe se 17 prej tyre vdiqën gjatë udhëtimit. Të dy u dërguan në spital në gjendje të rënduar, me dehidrim dhe kequshqyerje.
Shërbimi spanjoll i shpëtimit në det dhe Garda Civile nisën një operacion kërkimi me helikopter në zonën ku u gjetën të mbijetuarit, ndërsa autoritetet theksuan se nuk kanë mundur ende të verifikojnë në mënyrë të pavarur numrin e viktimave.
Në një operacion tjetër po atë ditë, një tjetër varkë me emigrantë u lokalizua pranë Majorkës. Shtatëmbëdhjetë persona u shpëtuan të gjallë, ndërsa dy të tjerë u gjetën të vdekur dhe kërkimet për personat e tjerë të zhdukur vazhdojnë. Rruga detare nga Algjeria drejt Ishujve Balearikë është bërë një nga korridoret me rritjen më të shpejtë të emigracionit drejt Bashkimit Evropian gjatë këtij viti.
