Sekretari Financiar i Ministrit të Thesarit në Britani, Spencer Livermore thotë se ribashkimi i vendit me Bashkimin Evropian është i pashmangshëm.
Ai deklaroi se përmbysja e Brexit ishte absolutisht në interesin ekonomik kombëtar të Mbretërisë së Bashkuar, duke vlerësuar gjithashtu përpjekjet e qeverisë së Keir Starmer për t’u rikthyer me Brukselin.
“Nëse në kohën e duhur do të rihyjmë në Bashkimin Evropian, sigurisht, pikëpamja ime personale është se kjo është e pashmangshme. Sigurisht që Mbretëria e Bashkuar në një moment do të rihyjë në Bashkimin Evropian”, u tha ai kolegëve në Dhomën e Lordëve.
“Ndërkohë, ne po bëjmë rivendosjen evropiane dhe kjo është jashtëzakonisht e rëndësishme për të ndihmuar rritjen në ekonominë tonë”, shtoi ai.
Kryeministri britanik Keir Starmer është zotuar të rindërtojë lidhjet me BE-në dhe ta vendosë Mbretërinë e Bashkuar “në zemër të Evropës”, duke nxitur akuza nga opozita se ai po përpiqet të “shkatërrojë” Brexit-in.
Mbretëria e Bashkuar votoi për t’u larguar nga blloku në vitin 2016, pas një fushate përçarëse referendumi që u përqendrua në kontrollin e imigracionit, financimin e Shërbimit Shëndetësor Kombëtar të Mbretërisë së Bashkuar dhe idenë e rimarrjes së sovranitetit parlamentar.
Vendimi për t’u larguar nga BE-ja është rikthyer në qendër të vëmendjes javët e fundit, pasi figura të larta të Partisë Laburiste janë përpjekur të rindezin debatin ndërsa garojnë për pozicione përpara një gare të mundshme për lidership.
