Chelsea ka zyrtarizuar Xabi Alonso si trajnerin e ri të skuadrës. Tekniku spanjoll do të nisë punën më 1 korrik 2026 dhe ka firmosur një kontratë katërvjeçare, të vlefshme deri në vitin 2030.
Pas eksperiencave te Bayer Leverkusen dhe Real Madrid, trajneri nga Tolosa rikthehet në Premier League, por jo te Liverpool, klub me të cilin ishte lidhur prej kohësh. Shtëpia e tij e re do të jetë Stamford Bridge.
Chelsea vendosi të lëvizë shpejt pas një sezoni shumë të vështirë, ku skuadra humbi finalen e FA Cup ndaj Manchester City dhe rrezikon të mbetet jashtë kompeticioneve europiane për sezonin e ardhshëm.
BlueCo kishte shqyrtuar edhe emra të tjerë si Andoni Iraola, Oliver Glasner, Marco Silva dhe Filipe Luis, por Xabi Alonso ishte kandidati kryesor për të marrë drejtimin e projektit.
Te Chelsea besojnë se ardhja e Alonso mund të rikthejë stabilitetin dhe besimin në një skuadër që ka ndryshuar shumë trajnerë vitet e fundit. Spanjolli pritet të ketë më shumë ndikim në vendimmarrje, jo vetëm në aspektin taktik, por edhe në ndërtimin e ekipit.
Tani nis një kapitull i ri për londinezët, me një nga trajnerët më të kërkuar në Europë që do të ketë gjithë verën në dispozicion për të vendosur idetë e tij te Chelsea.
