Ernest Muçi është tashmë përfundimisht futbollist i Trabzonspor. Besiktas ka dalë me një komunikatë zyrtare, ku ka konfirmuar se klubi i Trabzonspor ka aktivizuar të drejtën e blerjes së kartonit të lojtarit të kombëtares shqiptare.
Në njoftimin e klubit thuhet se Trabzonspor ka ushtruar opsionin e blerjes të përfshirë në marrëveshjen e huazimit. Për këtë transferim, Besiktas do të përfitojë 8.5 milionë euro, plus TVSH.
“Falënderojmë Ernest Muçin për kontributin e dhënë në klubin tonë dhe i urojmë suksese në karrierën e tij të ardhshme”, thuhet në komunikatën e Besiktas.
Edhe Trabzonspor ka konfirmuar zyrtarisht blerjen përfundimtare të Muçit, duke njoftuar aktivizimin e klauzolës së vendosur në marrëveshjen e huazimit.
Në total, operacioni për futbollistin shqiptar pritet të shkojë në 9.5 milionë euro, një shifër që përbën rekord për Trabzonspor sa i përket investimit për një lojtar.
Pas zyrtarizimit të transferimit, Muçi dhe skuadra e tij do të përqendrohen te finalja e Kupës së Turqisë, që do të luhet më 22 maj ndaj Konyaspor.
