Ishulli turistik i Kios në Greqi po përballet prej tre ditësh me një valë të fuqishme zjarresh, që kanë përfshirë sipërfaqe të mëdha toke dhe pyje, duke detyruar autoritetet të shpallin gjendjen e jashtëzakonshme.
Sipas autoriteteve greke, mbi 440 zjarrfikës me 85 automjete dhe 13 mjete ajrore helikopterë dhe avionë janë angazhuar në operacionin për shuarjen e flakëve, të mbështetur nga ndihma shtesë nga Athina, Selaniku dhe ishulli i Lesbos.
Ministri i Mbrojtjes Civile dhe i Krizës Klimatike, Giannis Kefalogiannis, deklaroi se ka dyshime serioze për zjarrvënie të qëllimshme, duke theksuar se vatrat janë përhapur në zona të ndryshme dhe të palidhura mes tyre.
“Po shtojmë prezencën policore dhe patrullimet ushtarake në Kios për të garantuar sigurinë dhe hetuar origjinën e zjarreve,” tha ministri.
Për momentin, nuk raportohet për viktima, por dëmet materiale janë të mëdha, ndërsa disa banorë janë evakuuar si masë paraprake. Autoritetet vijojnë të apelojnë për vigjilencë dhe bashkëpunim me shërbimet emergjente.
