Ministri i Brendshëm, Ervin Hoxha njoftoi sot se procesi i përgatitjeve për zgjedhjet parlamentare të 11 Majit 2025 ka hyrë në fazën aktive.
Duke publikuar ekstraktin e parë të listës zgjedhore, ministria konfirmoi se 3,721,116 qytetarë kanë të drejtën e votës, nga të cilët 50.5% janë burra dhe 49.5% gra.
Ministri ftoi qytetarët jashtë Shqipërisë të rinovojnë dokumentet e identifikimit për të shmangur pengesat gjatë regjistrimit. Lista paraprake e votuesve do të publikohet më 9 mars 2025, me një afat 48 orësh për zgjedhësit që të konfirmojnë vendin ku do të votojnë.
“Ministria e Brendshme ka nisur zyrtarisht procesi i përgatitjeve për zgjedhjet parlamentare të 11 Majit 2025. Gjendja Civile ka publikuar ekstraktin e parë të listës zgjedhore, në përputhje të plotë me përcaktimet ligjore dhe standardet e Kodit Zgjedhor.
Sipas të dhënave, të drejtën e votës e gëzojnë 3721116 shtetas shqiptarë, ndër ta 50% janë të gjinisë meshkuj, 49.5% janë femra. Të pa përfshirë në listë deri në këtë moment janë 4356 shtetas, të cikët janë mbi 100 vjeç që mbushin apo do të mbushin deri në 11 maj. Për të siguruar të drejtën e votës këta qytetarë duhet të paraqiten para gjendjes civile për tu përfshirë në listë”, tha Hoxha.
Gjithashtu ministri i Brendshëm deklaroi se nga data 11 janar nis procesi i regjistrimit të votuesve jashtë Shqipërisë. Regjistrimi do të bëhet përmes platformës elektronike që mund të kryhet përmes aplikacionit të KQZ.
