Një udhëtare e shpeshtë ka zbuluar një truk të thjeshtë që, sipas saj, i kursen “qindra dollarë” sa herë që qëndron në një hotel, duke përfituar ushqim falas dhe përmirësime dhomash. TikTokerja @azartravelz e ndau këshillën në një video “Travel Hack Tuesday”, ku tregon se e përdor këtë metodë pothuajse në çdo pushim familjar.
Sipas Azar, hapi i parë është të gjendet emri i menaxherit të përgjithshëm të hotelit ku do të qëndrosh, zakonisht përmes internetit ose duke telefonuar vetë hotelin. Më pas, ajo dërgon një email të thjeshtë, ku njofton për datat e qëndrimit, numrin e rezervimit dhe shpreh entuziazmin për vizitën, duke përmendur edhe ndonjë arsye të veçantë, si një ditëlindje apo festë.
Në mesazhin e saj, Azar pyet në mënyrë të sjellshme nëse hoteli mund ta bëjë qëndrimin “më të veçantë”, për shembull me një përmirësim dhome, mëngjes falas ose akses në shërbime ekskluzive. Ajo thotë se i gjithë procesi zgjat vetëm 10 minuta dhe, sipas përvojës së saj, ka funksionuar gjithmonë. Në një udhëtim të fundit në Turqi, familja e saj u përmirësua në një suitë dhe përfitoi mëngjes falas për pesë persona, duke kursyer mijëra dollarë.
Edhe përdorues të tjerë në TikTok kanë ndarë histori suksesi duke përdorur këtë truk, ndërsa një menaxher hoteli sugjeroi që anëtarësimi në programet e besnikërisë rrit shanset për përfitime. Vetë Azar thekson se “më e keqja që mund të ndodhë është të të thonë jo”, ndërsa shpesh, në minimum, përfiton një dhomë me pamje më të mirë ose më të madhe, e në rastet më të mira, kursime të konsiderueshme.
