Barcelona duket e gatshme të heqë dorë nga Ronald Araujo gjatë merkatos së verës, në kuadër të një ndryshimi të madh në qendër të mbrojtjes. Sipas raportimeve, drejtuesit e klubit katalanas nuk e konsiderojnë më uruguaianin si të paprekshëm dhe kanë dhënë dritën jeshile për largimin e tij.
Paraqitjet e paqëndrueshme dhe pasiguritë e shfaqura së fundmi thuhet se kanë ndikuar në humbjen e besimit të klubit ndaj mbrojtësit 27-vjeçar. Barcelona synon që të ardhurat nga shitja e Araujo t’i përdorë për të forcuar repartin defensiv për sezonin e ri.
Në garë për shërbimet e tij përmenden Manchester United dhe Chelsea. Megjithatë, klubi anglez nga “Old Trafford” raportohet se është më i vendosur dhe po përgatit kontaktet e para me përfaqësuesit e lojtarit, duke e parë atë si një zëvendësim cilësor për Harry Maguire.
Nga ana tjetër, Barcelona nuk ka ndërmend ta lërë të lirë për një shumë të ulët. Klubi katalanas raportohet se kërkon jo më pak se 100 milionë euro për kartonin e tij. Këtë sezon, Araujo ka zhvilluar 27 ndeshje me fanellën blaugrana dhe ka shënuar 3 gola, ndërsa kontrata e tij është e vlefshme deri në vitin 2031.
