Policia e Shkodrës ka finalizuar operacionin e koduar “Game Over”, në kuadër të goditjes së veprimtarive të paligjshme.
Sipas njoftimit zyrtar, në fshatin Bajzë u zbulua një lokal ku shitej lëndë narkotike e dyshuar kokainë dhe organizoheshin lojëra fati. Gjatë ndërhyrjes, shërbimet e policisë arrestuan në flagrancë pronarin e lokalit, shtetasin G. P., 26 vjeç, banues në fshatin Vukpalaj.
Nga kontrollet e ushtruara në ambientet e lokalit u sekuestruan doza të lëndës së dyshuar narkotike kokainë, 4 celularë, 1 makinetë për lojëra fati, pije alkoolike të dyshuara të kontrabanduara, si dhe një shumë parash e dyshuar e përfituar nga aktivitetet e paligjshme.
Gjithashtu, nga verifikimet rezultoi se subjekti ushtronte aktivitet pa qenë i regjistruar në organet kompetente.
Operacioni u zhvillua nga specialistët e Seksionit për Hetimin e Krimeve Ekonomiko-Financiare dhe të Seksionit për Hetimin e Narkotikëve, me mbështetjen e Forcës së Posaçme “Shqiponja”, në vijim të kontrolleve për parandalimin dhe goditjen e paligjshmërisë.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
