Deputetja e Partisë së Lirisë, Erisa Xhixho, deklaron se mungesa e transparencës për lejet e ndërtimit dhe sipërfaqet e dhëna për betonizim është alarmante.
Përmes rrjeteve sociale, Xhixho thotë se të dhënat tregojnë se sipërfaqja e dhënë për ndërtim është gati 4 herë më e lartë se ajo që deklarohet zyrtarisht.
Reagimi i Xhixhos
NDËRTIMI, LAVATRIÇJA E PARAVE TË PISTA
Sa po ndërtohet realisht në Shqipëri dhe pse qeveria nuk tregon të vërtetën?
Mungesa e transparencës për lejet e ndërtimit dhe sipërfaqet e dhëna për betonizim është alarmante. Të dhënat tregojnë se sipërfaqja e dhënë për ndërtim është gati 4 herë më e lartë se ajo që deklarohet zyrtarisht.
Pse fshihet kjo shifër? Sa leje janë dhënë realisht, sa territor po i dorëzohet betonit dhe kush po përfiton?
Ndërkohë, Tirana dhe bregdeti janë kthyer në kantiere, çmimet janë bërë të papërballueshme dhe një familjeje me të ardhura mesatare i duhen rreth 60 vite për të blerë një shtëpi.
Por mbi 50 mijë apartamente në Tiranë rezultonin bosh në vitin 2024.
Atëherë kush po blen?
Nëse oferta rritet vazhdimisht, pse çmimet vetëm rriten? Nga vijnë paratë që mbajnë gjallë këtë industri?
Rreth 12 miliardë euro qarkullojnë jashtë bankave, ndërsa korrupsioni i kushton ekonomisë shqiptare rreth 1 miliardë euro çdo vit. Nëse trendi vazhdon, humbjet mund të arrijnë deri në 4.8 miliardë euro deri në vitin 2030.
Këto shifra kërkojnë transparencë dhe hetim, jo propagandë.
A është ndërtimi kthyer në një lavatriçe për kapitalin me origjinë të dyshimtë?
Qeveria duhet të përgjigjet:
Kush po financon? Kush po blen? Me çfarë parash? Dhe pse fshihen të dhënat reale të këtij bumi ndërtimi?
Shqipëria nuk ka nevojë për kulla që fshehin realitetin e trishtë të mijëra shqiptarëve që nuk mbyllin dot muajin.
Mbi të gjitha, Shqipërisë i duhet transparencë dhe llogaridhënie.
