Ish-trajneri i Barcelonës, Xavi Hernández, ka zbuluar se Lionel Messi ishte shumë pranë rikthimit te klubi katalanas në janar të vitit 2023, por transferimi u ndal në momentet e fundit nga presidenti Joan Laporta.
Në një intervistë për La Vanguardia, Xavi tregoi se negociatat me yllin argjentinas kishin avancuar shumë pas Kupës së Botës 2022 dhe se gjithçka dukej gati për rikthimin e tij në “Camp Nou”.
“Leo ishte praktikisht i firmosur. Ai më tha se kishte dëshirë të rikthehej dhe unë e shihja këtë qartë,” u shpreh Xavi.
Sipas tij, edhe La Liga kishte dhënë dritën jeshile për operacionin, por në fund ishte presidenti Joan Laporta ai që vendosi ta ndalte marrëveshjen.
“Laporta më tha fjalë për fjalë se nëse Leo do të rikthehej, do të kishte një luftë të madhe dhe ai nuk mund ta lejonte këtë. Pas kësaj, Messi ndaloi së përgjigjuri në telefonatat e mia sepse nga ana tjetër i kishin thënë se rikthimi nuk mund të ndodhte,” tregoi ish-mesfushori katalanas.
Xavi pranoi gjithashtu se kjo situatë ndikoi për një periudhë në marrëdhënien e tij me Messin, pasi argjentinasi mendoi se ai ishte pjesë e vendimit për të bllokuar transferimin. Megjithatë, ai theksoi se raporti mes tyre tashmë është përmirësuar.
“Isha shumë i dëshiruar që Leo të rikthehej. Edhe sot mendoj se ai do ta ndihmonte shumë ekipin, me gola dhe me pasimet vendimtare,” përfundoi Xavi.
