Iliria News ka siguruar foton e autorit të dyshuar të ngjarjes së rëndë të regjistruar mëngjesin e kësaj të premteje në fshatin Vidhisht të Roskovecit.
Bëhet fjalë për Refit Buzin, 35 vjeç, i cili dyshohet se ka vrarë me armë gjahu ish-vjehrrin e tij, Kosta Plakën, 58 vjeç, si dhe ka plagosur ish-vjehrrën, Belere Plakën, rreth 55 vjeçe.
Sipas informacioneve paraprake të Policisë së Shtetit, ngjarja ka ndodhur rreth orës 06:00, ndërsa pas krimit autori i dyshuar është larguar nga vendi i ngjarjes me automjet, së bashku me ish-bashkëshorten e tij. Dyshohet se ai ka marrë me vete edhe armën e gjahut që dyshohet se është përdorur në krim.
Menjëherë pas njoftimit, forca të shumta policie kanë mbërritur në zonë, kanë ngritur pika kontrolli dhe kanë nisur operacionin për lokalizimin dhe kapjen e 35-vjeçarit.
Ndërkohë, ish-vjehrra e tij, e cila mbeti e plagosur gjatë sulmit, është transportuar në spital dhe ndodhet nën kujdesin e mjekëve.
Grupi hetimor ndodhet në vendngjarje dhe, nën drejtimin e Prokurorisë, po vijon punën për zbardhjen e plotë të dinamikës së krimit, si dhe për dokumentimin ligjor të rrethanave që çuan në këtë ngjarje të rëndë.
Policia vijon kontrollet intensive për kapjen e autorit të dyshuar.
