Durrës – Policia e Durrësit ka ekzekutuar masat e sigurisë “arrest në burg” ndaj dy kushërinjve të dyshuar për vrasjen e 45-vjeçarit Denis Çumani, ngjarje e ndodhur në muajin janar 2026 në Shijak.
Në pranga kanë rënë Indrit Ferra, 38 vjeç dhe Dorian Ferra, 36 vjeç, të dy banues në Shijak.
Masat e sigurisë janë caktuar nga Gjykata e Shkallës së Parë e Juridiksionit të Përgjithshëm Durrës, për veprat penale “Vrasja me dashje”, e kryer në bashkëpunim, si dhe “Mbajtja pa leje dhe prodhimi i armëve, armëve shpërthyese dhe municionit”.
Më datë 27 janar 2026, në qytetin e Shijakut, të dy të dyshuarit u konfliktuan për shkak të një vazje me 45-vjeçarin Denis Çumani. Gjatë përplasjes, ata e qëlluan me armë zjarri, duke i shkaktuar plagë të rënda.
I plagosuri u dërgua me urgjencë në spital, por për shkak të dëmtimeve të marra nuk arriti t’u mbijetojë plagëve dhe ndërroi jetë disa ditë më vonë në Spitalin e Traumës në Tiranë.
Pas disa muajsh në kërkim, policia bëri të mundur lokalizimin dhe arrestimin e dy kushërinjve Ferra.
