Vinicius Junior ka reaguar pas eliminimit të Brazilit nga Kupa e Botës 2026, duke kërkuar falje për dështimin e Seleçaos në fazën e 1/16-ave.
Sulmuesi i Real Madridit publikoi një mesazh në rrjetet sociale, ku pranoi zhgënjimin e madh pas humbjes 2-1 ndaj Norvegjisë, në një ndeshje ku Haaland vendosi fatin e kualifikimit me dy golat e tij.
“Do të ishte e padrejtë të qëndroja në heshtje, por më duheshin disa ditë për të reflektuar”, shkroi Vinicius, duke theksuar se eliminimi në këtë fazë të Botërorit është një ndjesi shumë e vështirë për t’u shpjeguar.
Braziliani pranoi se skuadra kishte potencial për të shkuar më larg, por nuk arriti ta bënte këtë në fushë.
“Kishim një ekip mjaftueshëm të fortë për të vazhduar më tej dhe nuk ia dolëm. Ndjenja e zhgënjimit është e jashtëzakonshme”, u shpreh ai.
Vinicius theksoi se fanella e kombëtares mbetet krenaria më e madhe e jetës së tij dhe se do të vazhdojë të luftojë për ta rikthyer Brazilin në majën e botës.
“Kërkoj falje dhe do të luftoj për ëndrrën tonë që të kthehemi në majën e botës”, përfundoi sulmuesi.
Në këtë Botëror, Vinicius luajti në të pesë ndeshjet e Brazilit, duke shënuar katër gola dhe duke dhënë një asist. Megjithatë, aventura e Seleçaos u mbyll më herët nga sa pritej, ndërsa pritja për një tjetër titull botëror vazhdon që nga viti 2002.
