Finalizohet operacioni policor i koduar “Shëtitësi” në Shkodër, në kuadër të përpjekjeve për parandalimin e vjedhjeve dhe zbardhjen e rasteve të ndodhura më parë.
Pas denoncimeve të qytetarëve dhe një pune të vazhdueshme hetimore, policia ka kapur në flagrancë një 56-vjeçar nga Durrësi, i cili dyshohet se ishte autor i disa vjedhjeve në qytet.
Sipas policisë, F. A., 56 vjeç, banues në Durrës, u kap në lagjen “Liria”, teksa tentonte të vidhte një tjetër biçikletë.
Nga hetimet dyshohet se 56-vjeçari ka vjedhur më herët një shumë parash në një automjet taksi dhe dy biçikleta, në zona të ndryshme të Shkodrës.
Materialet procedurale i janë referuar Prokurorisë së Shkodrës, për veprime të mëtejshme.
