Një dyqan bulmeti është vjedhur gjatë natës në lagjen nr. 3 në Pogradec.
Autorët kanë hapur me forcë derën e biznesit dhe kanë marrë të gjithë mallin që ndodhej brenda, duke shkaktuar një dëm ekonomik prej më shumë se 2 milionë lekësh.
Pronari thotë se ka ardhur në dyqan rreth orës 07:30 të mëngjesit për të hapur biznesin, por e ka gjetur atë të thyer dhe të boshatisur.
Ai shprehet se kjo është hera e dytë që dyqani i tij vidhet brenda pesë muajsh, ndërsa edhe pas rastit të parë autorët nuk janë identifikuar nga policia.
Ndërkohë, uniformat blu kanë sekuestruar kamerat e sigurisë të zonës, me qëllim identifikimin e autorit ose autorëve të ngjarjes.
Pronari i biznesit shprehet i shqetësuar për sigurinë dhe vijimin e aktivitetit të tij.
“Jemi të shqetësuar dhe të frikësuar për punën tonë. Nuk mund të punojmë në këtë formë, të vidhemi dy herë në qendër të qytetit dhe të mos kapet askush. Duam që policia ta zbardhë ngjarjen sa më shpejt. Nuk jemi aspak të qetë dhe nuk e di nëse do ta vazhdoj më këtë punë. Është hera e dytë brenda 5 muajsh.”
Policia po vijon hetimet për zbardhjen e plotë të ngjarjes.
