Prokuroria e Posaçme (SPAK) ka kërkuar në total 302 vite burg për 15 të pandehurit e dosjes së bujshme “Plumbi i Artë”, e cila lidhet me një sërë ngjarjesh kriminale, përfshirë vrasje dhe trafik droge.
Në pretencën e paraqitur, prokuroria ka kërkuar dënime të ndryshme për të pandehurit, në varësi të akuzave dhe rolit që dyshohet se kanë pasur në aktivitetet kriminale.
Për te penduarin e drejtësisë, Nuredin Dumani SPAK kërkoi 10 vite burg, ndërsa për Erion Alibej 15 vite heqje lirie.
Dënimi më i rëndë është kërkuar për Enrik Hoxhën dhe Petrit Qolin me nga 35 vite burg.
Konkretisht, SPAK ka kërkuar:
Nuredin Dumani – 10 vite burg.
Erjon Alibej – 15 vite burg.
Skerdi Tase – 13 vite burg.
Enrik Hoxha – 35 vite burg.
Enver Dive – 25 vite burg.
Besian Xhixha – 25 vite burg.
Asllan Plaku – 20 vite burg.
Ardian Uzuni – 15 vite burg.
Gentian Sharra – 9 vite burg.
Agron Qoli – 20 vite burg.
Petrit Qoli – 35 vite burg.
Fatos Gosa – 20 vite burg.
Xhulia Hoxha – 20 vite burg.
Albert Pashai – 15 vite burg.
Altin Doci – 25 vite burg.
Dosja
Dosja “Plumbi i Artë” është një nga hetimet më të mëdha të SPAK kundër krimit të organizuar në Shqipëri. Ajo lidhet me një rrjet kriminal të dyshuar për vrasje me pagesë, atentate, trafik droge, vendosje eksplozivësh dhe veprimtari të tjera kriminale, kryesisht në zonat e Elbasanit, Durrësit dhe Tiranës.
Hetimet morën një zhvillim të rëndësishëm në vitin 2022, pas arrestimit të Nuredin Dumanit, i cili u plagos në një atentat në Papër të Elbasanit. Pas arrestimit, Dumani vendosi të bashkëpunonte me drejtësinë dhe rrëfeu për një sërë ngjarjesh kriminale, duke zbuluar emra dhe lidhje mes personave të dyshuar.
Në hetime u përdorën edhe komunikimet në platformën e koduar Sky ECC, përmes të cilave SPAK pretendon se ka zbardhur biseda dhe plane për ngjarje të ndryshme kriminale.
Çfarë ngjarjesh përfshin?
Në dosjen hetimore përmenden, ndër të tjera:
Vrasja e dy vëllezërve Haxhia në Durrës.
Vrasja e Dorian Shkozës dhe Anxhelo Avdias.
Atentati dhe planet për eliminimin e personazheve të njohur të botës së krimit.
Vendosja e eksplozivit në banesën e Talo Çelës.
Vrasja e Fatmira Dedjes.
Plane për atentate ndaj personave të tjerë, përfshirë Indrit Doklen dhe Emiliano Ramazanin.
