Një zjarr i fuqishëm ka përfshirë zonën pyjore pranë fshatit Dukat në bashkinë e Vlorës, duke u afruar rrezikshëm pranë banesave. Flakët kanë qenë intensive dhe përhapja e tyre është përshpejtuar nga era dhe terreni i thyer malor.
Sipas banorëve, zjarri “thuajse hyri në fshat”, ndërsa reagimi ajror ka qenë i kufizuar. Një helikopter i ushtrisë ka ndërhyrë vetëm tri herë për të hedhur ujë mbi vatrat e zjarrit, dhe më pas është tërhequr pa u rikthyer.
Banorët shprehen të shqetësuar dhe të pasigurt për situatën, pasi deri tani mungon një plan i qartë evakuimi apo ndërhyrje tokësore e koordinuar nga autoritetet. Nuk ka ende informacion zyrtar mbi dëmet materiale apo rrezikun konkret për jetën e njerëzve.
Situata mbetet e paqartë dhe kërkohet urgjentisht ndërhyrje më e gjerë për të frenuar përhapjen e flakëve dhe për të garantuar sigurinë e komunitetit lokal.
