Aktori dhe moderatori i njohur Florjan Binaj i është futur zyrtarisht politikës. Ai do të garojë për postin e kryetarit të Bashkisë së Tiranës.
Ky hap shënon një kthesë të madhe në karrierën e tij, pasi Binaj do të duhet të mbyllë kapitullin e tij në televizion, duke u larguar nga emisioni investigativ “Piranja”, ku prej vitesh ishte një prej figurave më të spikatura.
Vendimi i Binajt është marrë pas konsultimesh të gjata, dhe lidhet me angazhimin e plotë që kërkon fushata elektorale. Ai pritet të përqendrohet në ndërtimin e një platforme që do të fokusohet në transparencë, shërbime publike dhe përfshirjen e të rinjve në vendimmarrje.
Florjan Binaj është një ndër personazhet më të dashur për publikun shqiptar, i njohur për rolet e tij humoristike në spektakle si “Portokalli”, por edhe për tonin kritik e ironik në “Piranja”. Kalimi i tij nga televizioni në politikë ka ngjallur reagime të shumta në rrjete sociale — ku shumë ndjekës e përgëzojnë për guximin, ndërsa të tjerë e shohin me skepticizëm hyrjen e tij në një arenë kaq të vështirë si politika.
Brenda Partisë Demokratike, emri i Binajt shihet si një përpjekje për të afruar figura të reja dhe të besueshme tek publiku, në një moment kur opozita kërkon të ringjallë besimin qytetar.
Zgjedhjet e pjesshme të 9 nëntorit pritet të jenë një test i rëndësishëm për opozitën, ndërsa gara për Tiranën, me Florjan Binajn në qendër të vëmendjes, pritet të jetë një nga më të ndjekurat.
Klikoni videon
