Vedat Muriqi ka reaguar pas mesazhit të veçantë që mori nga Samuel Eto’o, disa ditë pasi u bë golashënuesi më i mirë i Mallorca në historinë e La Liga, duke kaluar pikërisht ish-sulmuesin kamerunas.
Shqiptari i Kosovës u shpreh i befasuar dhe njëkohësisht shumë i prekur nga urimi i një legjende të futbollit si Eto’o, ndërsa theksoi se e vlerëson shumë gjestin e tij dhe gjithçka që ai ka bërë gjatë kohës te Mallorca.
“Nuk e prisja. Para së gjithash, faleminderit shumë, sidomos kur vjen nga një legjendë e vërtetë si Samuel Eto’o. Jam shumë mirënjohës për fjalët e tij. E di që ai ka bërë një punë të jashtëzakonshme këtu dhe të gjithë e dinë çfarë karriere ka pasur më pas. E falënderoj sinqerisht që mori kohë për të regjistruar këtë video dhe për të më uruar.
Jam profesionist prej 15 ose 16 vitesh. Nëse dikush do të më kishte thënë para 15 vitesh se një ditë Samuel Eto’o do të më dërgonte një video, do të kisha thënë se ishte e pamundur, një shaka. Dhe megjithatë, ja ku jemi sot. Jam shumë, shumë krenar për veten time.
Një falënderim i madh për të për videon. Dhe siç them gjithmonë: faleminderit bashkëlojtarëve të mi, gjithë stafit të klubit, tifozëve, familjes sime, ishullit… Sepse pa ju, e them me gjithë zemër, do të kishte qenë e pamundur të arrija deri këtu. Faleminderit shumë të gjithëve”, deklaroi Muriqi.
