Në Parkun Olimpik “Feti Borova” po zhvillohet turneu “Muhamet Malo” në mundje. Pra, në Tiranë ka nisur dhe vijon edicioni i pestë i këtij turneu ndërkombëtar të mundjes, i quajtur saktësisht “Muhamet Malo Ranking Series”.
Bëhet fjalë për një kompeticion të përmasave të mëdha, pjesë e kalendarit të Bashkimit Botëror të Mundjes, që ka sjellë në vendin tonë mbi 720 mundës nga e gjithë bota, përfshirë kampionë olimpikë e botërorë. Pjesëmarrësit vijnë nga Irani, Japonia, Ukraina, Gjeorgjia, Armenia, Kina, Kazakistani, Kirgistani dhe Shtetet e Bashkuara të Amerikës. Dita e parë e dueleve në sallën “Feti Borova” të Parkut Olimpik në kryeqytet ka sjellë edhe medaljen e parë kuqezi në këtë aktivitet.
Suksesi mban firmën e medalistit olimpik, Chermen Valiev. Kampioni kuqezi e nisi nga raundi 1/8 duke kaluar me sukses duelin e parë kundër armenit Narek Harutyunyan me rezultatin 9-0. Më tej në çerekfinale mposhti me rezultatin 5-1 Orozobek Toktomembetov te Kirgistanit.
Në gjysmëfinale kaloi me rezultatin 8-3 iranianin Yones Aliakbar Emamichoghaei. Në fund, në finale, Veliev mposhti 2-0 rivalin që përfaqëson Sllovakinë, Taimuraz Salkazanov, duke merituar medalje e artë. Kështu, pas medaljes historike në Lojërat Olimpike ‘Paris 2024″, Chermen Valiev konfirmon formën e shkëlqyer, duke vijuar serinë e paraqitjeve të shkëlqyera në arenën ndërkombëtare.
Ndërkohë medalisti tjetër kuqezi i Olimpiadës, Islam Dudaev, u ndal në raundit 1/8 në turneun “Muhamet Malo”. Dudaev u mund nga japonezi Kaisei Tanabe me rezultatin 10-8. Ditën e sotme do të garojnë mundës të tjerë tanët, si Kevin Kupi, Klodian Shehu dhe Albina Drazhi.
Më shumë mbi turneun ndërkombëtar “Muhamet Malo”
Ky turne ka nisur më 26 shkurt dhe do të vijojë deri më 2 mars në mjediset e Parkut Olimpik. Mbi 700 sportistë nga e gjithë bota, pjesëmarrës në këtë turne prestigjoz, e bëjnë këtë ngjarje sportive një mundësi të shkëlqyer për promovimin e sportit shqiptar dhe atij të mundjes në veçanti.
Në “Ranking Series Muhamet Malo”, kombëtarja shqiptare do të përfaqësohet me një ekip të plotë, në të dyja stilet, meshkuj dhe femra. Ky event organizohet falë mbështetjes së fondacionit “Muhamet Malo”.
I ndarë nga jeta në vitin 2017, Muhamet Malo ka qenë një ikonë e sportit të mundjes, ish-sportist dhe president i kësaj federate. Prej vitesh në Shqipëri organizohet një turne në nderim të tij, që njihet edhe nga ndërkombëtarët.
