UEFA ka reaguar ashpër ndaj planit të FIFA-s për të tërhequr investime private në aktivitetet e saj, përfshirë edhe Kupën e Botës.
FIFA synon të krijojë një kompani të re, të quajtur FIFA Forward Enterprise, ku palët e treta mund të blejnë aksione të pakicës pa marrë kontrollin e saj. Objektivi është që fondet për zhvillimin e futbollit në mbarë botën të kalojnë shifrën e 10 miliardë dollarëve.
Sipas projektit, secila prej 211 federatave anëtare mund të përfitojë deri në 20 milionë dollarë financim. Megjithatë, UEFA ka ngritur shqetësime për mungesën e transparencës dhe mundësinë që interesat private të ndikojnë në të ardhmen e kompeticioneve.
“Kjo kalon një vijë që institucionet drejtuese të futbollit nuk duhet ta kalojnë kurrë. Shpirti dhe drejtimi i futbollit nuk janë pasuri që mund të tregtohen. Askush prej nesh nuk është pronar i futbollit dhe FIFA nuk mund ta shesë atë”, thuhet në reagimin e UEFA-s.
Në Europë ekziston frika se kërkimi për më shumë të ardhura mund të çojë në zgjerimin e mëtejshëm të Kupës së Botës dhe Botërorit për Klube, duke shtuar numrin e ndeshjeve dhe presionin mbi një kalendar tashmë të mbingarkuar.
FIFA këmbëngul se do të ruajë kontrollin e plotë mbi kompeticionet, kalendarin ndërkombëtar dhe vendimet sportive. Propozimi duhet të miratohet me votë nga federatat anëtare dhe mund të diskutohet në Kongresin e FIFA-s në muajin mars.
