Detaje të reja janë zbardhur nga ngjarja e rëndë e shënuar pak ditë më parë në Tiranë, ku u vra me armë zjarri Klaudio Prendi, djali ish-gjyqtarit Fran Prendi.
Bëhet me dije se Audi me targa greke që u përdor nga autorët, është vjedhur rreth një vit më parë në Tiranë. Mjeti ka qenë vjedhur në zonën e Liqenit Artificial, ndërsa tashmë është përdorur gjatë atentatit.
Djali i ish-gjyqtarit të Krimeve të Rënda, Fran Prendi u qëllua për vdekje sapo doli nga lokali ku qëndronte me shokët. Gjithçka ndodh në pak sekonda; Klaudio Prendi sapo futet në mjetin “Mercedes Benz G Class” që e kishte parkuar buzë rrugës dhe menjëherë përballë vjen makina e autorëve, një Audi RS6.
Mjeti qëndron paralel me derën e parë të makinës së 30 vjeçarit dhe në këtë moment mendohet të jetë kryer vrasja me 5 plumba me pistoletë me silenciator. Mjeti i autorëve, të cilët mendohet se janë tre, largohet nga vendi i ngjarjes dhe aty vijnë shokët e Klaudios.
Ata grumbullohen të shqetësuar pranë “G Class” dhe më pas shohin se ai është i gjakosur. Fatkeqësisht, Klaudio Prendi ndërroi jetë në spital për shkak të plagëve nga arma e zjarrit, të shkaktuara në kokë dhe trup. Ndërkohë, Policia pak minuta pas vrasjes gjeti makinën e autorëve të djegur në Farkë dhe brenda saj armën e zjarrit pistoletë me silenciator.
