Kryeministri Edi Rama, në rubrikën “Sy m’sy” me ndjekësit, foli për akuzat se i është kundërvënë SPAK pas arrestimit të kryebashkiakut të Tiranës Erion Veliaj. Kreu i qeverisë thotë se nuk konteston provat duke iu kundërvënë SPAK por thjesht ka ngritur një problem parimor duke kërkuar standarte demokratike.
Sipas tij, arrestimi i kryebashkiakut erdhi në një kohë që ai është i dyshuar dhe jo i pandehur.
Rama: Ju duket normale që një kryebashkiak të merret nga zyra, të çohet në gjyq pa prova. Si udhëheqësi që i ka dhënë jetë SPAK, duke vënë në tavolinë dhe ekzistencën e qeverisë. Mos të bëj unë kërkesë për standarde demokratike?
Kur thonë tironsit u njohëm içik si shumë. Ça janë zgjedhësit që zgjedhin, mish për top? Kush e drejton bashkinë e Tiranës tani? Kush do ti bëjë 1001 punët tani? Apo gjykatësit? Dikush ka thënë, prokurori ka të drejtë dhe të çmendet, po gjykata e mban peshën është garanti. Këtu është bërë gjykata stërspeciale, që rrit peshën e dënimit paraprak. Shkon prokurori i SPAK te gjykatësi, dhe i thotë ik thellohu se duhet masë më e rëndë. Gjykatësit janë mbi opinionin publik. Gjykatësit i jepet pushteti që të marrin masa kur të zgjedhurit e popullit kanë kryer shkelje.
