Dy kushërinj shqiptarë, të cilët kishin udhëtuar drejt Italisë me viza turistike, janë përballur me drejtësinë pas arrestimit për posedim të lëndëve narkotike me qëllim trafikimi.
Bëhet fjalë për Olgert Prengën, 29 vjeç, me precedent penal, dhe Klisman Ndojn, 25 vjeç, pa precedent, të cilët u ndaluan nga policia në zonën e Aymavilles, në rajonin e Valle d’Aosta. Pas shqyrtimit të çështjes, gjyqtari i hetimeve paraprake vendosi masa sigurie alternative ndaj tyre.
Konkretisht, Prenga është lënë në arrest shtëpiak brenda rajonit të Valle d’Aosta, ndërsa Ndoj është ndaluar të qëndrojë në të gjitha komunat e këtij rajoni.
Dy të rinjtë kishin marrë me qira një apartament në një shtëpi pushimi, por sjellja e tyre kishte ngjallur dyshime tek banorët vendas, të cilët kishin raportuar për lëvizje të pazakonta dhe frekuentim nga persona të panjohur. Pas këtyre sinjalizimeve, policia kishte nisur vëzhgimin e tyre për disa ditë.
Gjatë kontrollit në një banesë ferme pranë zonës, ku ata ishin parë duke hyrë e dalë disa herë, u zbulua një kavanoz me kokainë. Ndërkohë, në apartamentin e marrë me qira u sekuestruan rreth 5 mijë euro cash, peshore precize si dhe rreth 15 gramë lëndë narkotike, përfshirë hashash dhe kokainë.
Në seancën për vlerësimin e masës së sigurisë, Ndoj zgjodhi të mos japë deklarime, ndërsa Prenga pretendoi se drogën e kishte blerë për përdorim personal. Gjykata vlerësoi se ekziston rrezik për përsëritje të veprës penale, por i konsideroi të mjaftueshme masat alternative ndaj paraburgimit, ndonëse prokuroria kishte kërkuar mbajtjen e tyre në burgun e Brissogne.
