Sabri dhe Novruz Vela janë dy vëllezërit e moshuar të gjetur të vdekur në banesën e tyre në Çorrush të Mallakastrës ditën e djeshme. Sipas ekpertizës mjeko-ligjore, Sabriu 90 vjeç dhe Novruzi 85 vjeç, kanë ndërruar jetë nga shkaqe natyrale katër apo pesë ditë më parë.
Dy vëllezërit nuk ishin të martuar dhe jetonin të dy së bashku në banesë në dhoma të ndara. Njëri prej tyre ka tentuar të heqë apo të veshë pantallonat dhe në atë moment ka humbur ekuilibrin. Për pasojë ai është rrëzuar në dysheme dhe ka përplasur kokën. Nga hematoma e shkaktuar nga goditja, i moshuari ka ndërruar jetë.
Vëllai tjetër, i cili ishte i paralizuar dhe qëndronte në një dhomë tjetër, në momentin që ka dëgjuar zhurma ka tentuar të ngrihet nga shtrati për të shkuar tek i vëllai. Në përpjekje e sipër, ai dyshohet të ketë ndërruar jetë.
Sabri dhe Novruz Vela jetonin prej vitesh vetëm dhe mbaheshin me të ardhurat e pensioneve. Ata nuk kishin familjarë dhe të afërm ndërsa banesa e tyre ishte rikonstrukturuar 3 vite më parë nga Bashkia Mallakastër.
