Presidenti amerikan Donald Trump ka postuar një mesazh të gjatë në platformën Truth Social, duke sulmuar kongresmenin republikan Thomas Massie, i cili kritikoi sulmet amerikane ndaj Iranit duke i quajtur “jo kushtetuese”.
Trump shkruan se operacioni ushtarak ishte i suksesshëm dhe se i kanë marrë iranianëve “bombën nga duart”.
“Kishim një sukses spektakolar ushtarak dje, duke ia marrë ‘bombën’ nga duart (dhe do ta përdornin nëse do të mundnin!), por, si zakonisht, pavarësisht gjithë lavdërimeve dhe vlerësimeve të marra, ky kongresmen ‘i lehtë’ është kundër asaj që u arrit me aq brilancë mbrëmë në Iran”, shkroi Trump.
Presidenti amerikan kritikoi republikanin Massie se është nga ata politikanë “dembelë që duan vetëm të bien në sy e që nuk sjellin asnjë rezultat”.
Ndërkohë falenderoi ushtrinë për atë që e quajti si “punë mahnitëse” dhe diçka “vërtetë të veçantë”, duke iu referuar sulmit në Iran.
Në fakt, mes Partisë Republikane ka një lloj përçarje mes një grupimi që ka qenë pro përfshirjes ushtarake dhe një krahu tjetër që kanë qenë kundër, e për këtë duhej të shprehej Kongresi.
