Arsenali ka marrë një lajm shumë të rëndë nga Kupa e Botës. William Saliba u dëmtua gjatë gjysmëfinales mes Francës dhe Spanjës dhe rrezikon të qëndrojë jashtë fushave për një periudhë të gjatë.
Qendërmbrojtësi francez nuk arriti ta vazhdonte ndeshjen dhe u detyrua të largohej nga fusha që në minutën e 30-të. Franca në fund u mposht 2-0 nga Spanja, por shqetësimi më i madh pas sfidës lidhet me gjendjen e Salibas.
Sipas L’Équipe, lojtari do t’u nënshtrohet ekzaminimeve të mëtejshme mjekësore, por në këtë fazë operacioni shihet si zgjidhja më e mundshme. Nëse ndërhyrja kirurgjikale konfirmohet, rikuperimi i tij mund të zgjasë nga katër deri në pesë muaj.
RMC raporton gjithashtu se, teksa po largohej nga fusha, Saliba përsëriti dy herë fjalët: “Shpina ime ka marrë fund.” Një frazë që tregon dhimbjen e madhe që po përjetonte mbrojtësi francez.
Nëse prognoza fillestare konfirmohet, 25-vjeçari do të humbasë nisjen e sezonit të ri dhe një pjesë të rëndësishme të fazës së parë të kampionatit me Arsenalin.
Për klubin londinez, ky është një goditje e madhe, pasi Saliba konsiderohet një nga liderët e mbrojtjes dhe një nga lojtarët më të rëndësishëm të skuadrës.
