Në Irlandën e Veriut ka shkaktuar tronditje një sulm i rëndë i ndodhur mbrëmjen e së hënës në Belfast, ku një burrë ka tentuar të sulmojë për vdekje një tjetër në rrugë, në një ngjarje që u ndalua nga ndërhyrja e kalimtarëve.
Sipas policisë së Irlandës së Veriut, i dyshuari është arrestuar dhe po mbahet në paraburgim nën akuzën e tentativës së vrasjes. Viktima ndodhet në spital në gjendje të rëndë, ndërsa po merr trajtim mjekësor intensiv.
Ngjarja ka ndodhur rreth orës 22:30 të mbrëmjes në një zonë pranë një kompleksi banimi në pjesën veriore të qytetit. Pamjet që kanë qarkulluar në rrjete sociale tregojnë momentet e sulmit dhe ndërhyrjen e disa qytetarëve që u përpoqën të ndalonin agresorin.
Kryeministri britanik, Keir Starmer, e ka dënuar ashpër ngjarjen, duke e cilësuar atë si “të tmerrshme dhe të neveritshme”, ndërsa ka shprehur mbështetje për viktimën dhe ka falënderuar shërbimet e emergjencës si dhe qytetarët që ndërhynë për të ndaluar sulmin.
Policia ka bërë të ditur se hetimet po vazhdojnë për të zbardhur motivet e ngjarjes, ndërsa u ka bërë thirrje qytetarëve të mos shpërndajnë pamjet e sulmit, për të mos dëmtuar hetimin dhe për të shmangur traumat shtesë për familjarët e viktimës.
