Gati 4,400 persona janë abuzuar nga priftërinjtë katolikë në Itali në raste të raportuara që nga viti 2020, sipas një raporti të publikuar të premten nga Rete l’Abuso, grupi më i madh i viktimave të abuzimit në Kishë.
Numri bazohet në rrëfimet e viktimave, të dhëna gjyqësore dhe raste të raportuara nga mediat, tha themeluesi i shoqatës, Francesco Zanardi. Rete l’Abuso nuk specifikoi periudhën e saktë kur kanë ndodhur rastet
Raporti zbulon se shumica e abuzimeve janë kryer nga priftërinj, ndërkohë që rastet e tjera përfshijnë murgesha, mësues të fesë, vullnetarë laikë, edukatorë dhe anëtarë të skautëve. Sipas organizatës, nga 1,250 raste të dyshuara, 1,106 janë kryer nga priftërinj dhe kanë përfshirë 4,395 viktima. Nga këto, 4,451 kanë qenë nën moshën 18 vjeç, ndërsa 4,108 kanë qenë meshkuj.
Vetëm 76 priftërinj të dyshuar për abuzim janë përballur me gjyqe kishtare, 17 janë pezulluar përkohësisht, 7 janë transferuar në famulli të tjera dhe 18 janë larguar përfundimisht nga priftëria. Pesë prej tyre kanë ndërruar jetë për shkak të vetëvrasjes.
Raporti ka rindezur presionin mbi peshkopët italianë për të përballuar krizën, ndërsa Papa Leo, së fundmi i zgjedhur, u takua këtë javë me të mbijetuarit e abuzimeve nga kleri, duke i bërë thirrje peshkopëve të rinj të mos fshehin akuzat.
Një raport i Komisionit të Vatikanit për Mbrojtjen e Fëmijëve tregoi më 16 tetor se vetëm 81 nga 226 dioqezat italiane kishin kthyer përgjigje për praktikat e tyre të mbrojtjes së fëmijëve.
