Tregu i punës po përballet me një polarizim në rritje ku rritja e pagave shfaqet si një proces i ndarë në dy botë të kundërta.
Sipas të dhënave të INSTAT për tremujorin e parë të vitit 2026 paga mesatare mujore bruto është rritur në 90.119 lekë duke shënuar një rritje prej 9,6% krahasuar me të njëjtën periudhë të vitit 2025.
Megjithatë kjo mesatare shërben si një maskë për pabarazitë që ekzistojnë mes aktiviteteve të ndryshme ekonomike.
Tregu i punës/ Thellohet hendeku i pagave
Në krye të piramidës qëndrojnë sektorët e aktiviteteve financiare dhe të sigurimit, me një pagë mesatare prej 157.434 lekësh, të ndjekur nga sektori i informacionit dhe komunikacionit me 131.747 lekë.
Ndërsa këta sektorë vazhdojnë të gëzojnë paga që tejkalojnë ndjeshëm mesataren kombëtare pjesa tjetër e tregut veçanërisht sektori i arteve dhe argëtimit ka shënuar rritjen më të ulët të pagave prej vetëm 5,5%.
Një faktor në këtë dinamikë ka qenë vendimi i Këshillit të Ministrave për rritjen e pagës minimale në 50.000 lekë nga 1 janari 2026.
Tregu i punës/ Thellohet hendeku i pagave
Kjo masë administrative ka sjellë një përqendrim të lartë të punonjësve në intervalet e pagave minimale, duke konfirmuar se për shumë biznese rritja e të ardhurave për punonjësit nuk buron nga produktiviteti, por nga detyrimet ligjore.
Kjo do të thotë se ndërsa punonjësit në sektorët elitë po shohin një rritje organike të mirëqenies, pjesa dërrmuese e punonjësve në shërbime po e marrin rritjen e pagës vetëm sepse shteti ka vendosur një prag të ri minimal.
Kjo strukturë sugjeron se hendeku mes atyre që fitojnë shumë dhe atyre që fitojnë pranë kufirit të mbijetesës po bëhet gjithnjë e më i vështirë për t’u shlyer.
