José Mourinho e ka pozicionuar me qëllim veten pranë orbitës së Real Madrid. Edhe pse deri tani nuk ka pasur asnjë lëvizje konkrete nga klubi madrilen, trajneri portugez ka lënë të kuptohet se nuk është i bllokuar në Lisbonë dhe se ka mënyra për t’u larguar nga Benfica.
Sipas burimeve pranë Mourinho, trajneri dëshiron që e ardhmja e tij të zgjidhet jo më vonë se më 24 maj. Ai po shqyrton tre skenarë të mundshëm për sezonin e ardhshëm.
Mourinho e ka bërë pjesën e tij me Benfica, duke dorëzuar një dosje me kërkesat e tij për të vazhduar në krye të skuadrës edhe në sezonin 2026-27, që është edhe viti i fundit i kontratës së tij aktuale.
Tashmë topi është në fushën e Rui Costa, presidentit të Benfica, i cili e solli Mourinho në klub në një lëvizje me peshë edhe elektorale. Skenari i parë është vazhdimësia, ku Rui Costa mund t’i propozojë një rinovim kontrate me një klauzolë të lartë largimi, që do t’i lidhte palët për një periudhë më të gjatë. Megjithatë, deri tani presidenti nuk ka marrë ende një vendim të qartë.
Mourinho, nga ana tjetër, nuk është një trajner që qëndron pasiv dhe e lë situatën vetëm në dorën e të tjerëve. Ai po analizon edhe opsionet për t’u larguar nga kontrata.
Mundësia e parë do të ishte nëse Rui Costa vendos për një ndryshim të menjëhershëm në stolin e Benfica, diçka që në Portugali nuk përjashtohet. Mundësia e dytë aktivizohet nëse një klub që i intereson, qoftë Real Madrid apo një tjetër, i ofron postin e trajnerit. Në këtë rast, Mourinho mund të përdorë klauzolën e largimit, e cila raportohet të jetë me një shumë shumë të ulët.
Kjo klauzolë funksionon në të dy drejtimet: është e njëjta shumë që Benfica do të duhej t’i paguante Mourinho nëse vendos ta shkarkojë gjatë verës.
Për trajnerin portugez ekziston edhe një afat i qartë. Mourinho nuk dëshiron të hyjë në muajin qershor pa e ditur se cilën skuadër do të drejtojë sezonin e ardhshëm. Ai i ka bërë të ditur Benfica se do të presë një vendim deri maksimumi një javë pas përfundimit të kampionatit portugez, që mbyllet më 16 maj me ndeshjen ndaj Estoril.
Ky afat nuk është i rastësishëm. Është një zgjedhje strategjike, pasi Premier League dhe La Liga përfundojnë pikërisht në fundjavën e 23-24 majit. Këto janë dy tregjet kryesore ku Mourinho po mban vëmendjen.
Real Madrid, ndërkohë, po e ndjek situatën nga distanca dhe me qetësi. Klubi madrilen i njeh mirë kushtet e mundshme të largimit të Mourinho nga Benfica, ndërsa nuk është sekret se mes drejtuesve të Real Madrid dhe trajnerit portugez vazhdon të ketë respekt, pavarësisht tre viteve të tij të diskutueshme në “Santiago Bernabeu”.
Për momentin, Real Madrid po tregohet i kujdesshëm me vendimin për stolin. Alvaro Arbeloa ka më shumë gjasa të largohet sesa të qëndrojë, dhe kjo ka nisur të sjellë shumë oferta e kontakte nga trajnerë të ndryshëm.
Mourinho është një nga emrat që i janë propozuar Real Madrid, ndërsa vendimi final pritet të merret në javët e ardhshme në “Bernabeu”.
