Një 53-vjeçar ka ndërruar jetë sot në Spitalin e Traumës në Tiranë, tre ditë pas një aksidenti të rëndë që ndodhi të hënën në fshatin Funarës të Librazhdit.
Viktima, Luan Çota, kishte mbetur i plagosur rëndë pasi automjeti me të cilin po udhëtonte doli nga rruga dhe u përplas disa herë me pemët anës saj. Për shkak të plagëve të rënda, ai u transportua fillimisht në spitalin e Librazhdit dhe më pas në Spitalin e Traumës, ku pavarësisht ndihmës mjekësore nuk arriti të mbijetojë.
Ngjarja ndodhi pranë qendrës së fshatit Funarës, në Njësinë Administrative Orenjë të bashkisë Librazhd. Sipas policisë, automjeti drejtohej nga shtetasi Besnik Laçku, i cili dyshohet se po lëvizte me shpejtësi dhe ka humbur kontrollin e mjetit në rrethana ende nën hetim.
Burime nga grupi hetimor bëjnë me dije se drejtuesi i automjetit ka rezultuar në gjendje të dehur në momentin e aksidentit dhe është ndaluar nga policia. Ndaj tij kanë nisur procedurat ligjore për shkelje të rregullave të qarkullimit rrugor dhe shkaktim aksidenti me pasojë të rëndë.
Hetimet vijojnë për të zbardhur plotësisht dinamikën e ngjarjes dhe përgjegjësitë ligjore.
