Një ngjarje e rëndë ka tronditur Valencian, pasi Fernando Martín, trajneri 44-vjeçar i ekipit B të femrave të klubit, raportohet mes të zhdukurve pas përmbysjes së një varke turistike në Indonezi, pranë Ishullit Padar, në zonën e Parkut Kombëtar Komodo (afër Labuan Bajo).
Sipas informacionit të publikuar nga media lokale “Jakarta Globe”, autoritetet indoneziane po vijojnë kërkimet për katër turistë spanjollë, të cilët udhëtonin si grup familjar dhe u zhdukën pasi mjeti lundrues ku ndodheshin u përmbys gjatë natës së së premtes. Në bordin e varkës turistike KM Putri Sakinah ndodheshin gjithsej 11 persona; 7 prej tyre u shpëtuan të gjallë, ndërsa 4 mbeten ende të paidentifikuar në terren.
Kreu i Autoritetit Portual të Labuan Bajo, Stephanus Risdiyanto, ka deklaruar se “katër personat e zhdukur janë shtetas spanjollë që udhëtonin si familje”, ndërsa Ministria e Transporteve ka konfirmuar se operacioni i kërkim-shpëtimit është në vijim, me përdorimin e mjeteve detare dhe ekipeve të zhytësve.
Operacioni koordinohet nga Basarnas dhe mbështetet nga Marina dhe policia detare, ndërsa autoritetet kanë nënvizuar se prioritet mbetet siguria e personelit dhe kushtet e detit.
Ndërkohë, klubi i Valencias ka reaguar në rrjetet sociale, duke shprehur dhimbje dhe mbështetje për familjarët, teksa pritet më shumë informacion zyrtar mbi fatin e të zhdukurve.
