Një tjetër shqetësim për Real Madridin. Éder Militao u detyrua të lërë fushën në minutat e fundit të pjesës së parë në ndeshjen ndaj Alavés, pasi ndjeu një problem fizik gjatë një aksioni në zonë. Mbrojtësi brazilian provoi të godiste drejt portës, por menjëherë pas përfundimit të aksionit kërkoi ndihmën e stafit mjekësor.
Fillimisht u dyshua për një problem në gju, duke qenë se Militao ka kaluar dy dëmtime të rënda të ligamentit të kryqëzuar në vitet e fundit. Megjithatë, lojtari u largua nga fusha pa vështirësi, ndërsa në vend të tij u aktivizua Rüdiger, me Tchouameni që përkohësisht u spostua në qendër të mbrojtjes.
Sipas vlerësimeve të para, bëhet fjalë për një problem të lehtë muskulor. Militao ndjeu një tërheqje në pjesën e pasme të kofshës së majtë (hamstring) dhe vendosi të mos rrezikojë përkeqësimin e situatës, sidomos me Botërorin që afrohet këtë verë.
Testet fillestare tregojnë se dëmtimi nuk duket serioz, por lojtari do t’i nënshtrohet kontrolleve të tjera për një diagnozë më të saktë. Ky është një pengesë e vogël për Militaon, i cili sapo ishte rikthyer pas një mungese katërmujore për shkak të një dëmtimi të rëndë muskulor.
