Teuta siguroi mbijetesën në Superiore, pasi mposhti Pogradecin me rezultatin 1-0. Kapiteni i skuadrës, Blerim Kotobelli, i cili u zgjodh lojtari i ndeshjes për paraqitjen në fushë, u shpreh se ky ishte një sezon i vështirë, ndërsa zbuloi se me trajnerin e ri, Edlir Tetova, do të luftojnë për trofe.
Fitorja – “Është një nga ndeshjet që e luaj për herë të parë në karrierë. Është shumë e vështirë. Është më e lehtë të luash për kampionatin sesa në këto ndeshje. E rëndësishme është që ia dolëm dhe shpresoj të mos gjendemi më kurrë në situata të tilla”.
Presidenca e re – “Ka ndryshuar shumë. Presidenca e re mendoj se i ka ndryshuar gjërat për mirë. Edhe pse ky sezon rrëshqiti, jam i bindur se sezoni i ardhshëm do të jetë një Teutë ndryshe dhe pretendente”.
Nga Final Four te mbijetesa – “Mendoj se pas janarit nuk ishim si në dy fazat e para. Aty nisi rrëshqitja. Pasi humbëm objektivin për vendin e katërt, pashë një motivim shumë ndryshe te skuadra. Ishte shumë e vështirë të motivoheshim dhe për këtë arsye erdhëm në këtë situatë”.
Tetova trajneri i ri – “Është pritur shumë mirë. Po vjen një trajner që ka fituar shumë trofe dhe mezi po presim të punojmë me të. Vitin që vjen normalisht do të luftojmë për një objektiv tjetër. Të jeni të sigurt për këtë”.
Lojtari i ndeshjes – “Këtë trofe do t’ia jap mamit tim”, u shpreh Kotobelli.
