Një tërmet me magnitudë 5.3 ballë të shkallës Rihter goditi në orët e para të mëngjesit veriperëndimin e Greqisë, pranë kufirit me Shqipërinë, raportojnë mediat greke.
Sipas Institutit Gjeodinamik të Greqisë, lëkundjet sizmike u regjistruan rreth orës 05:32. Epiqendra e tërmetit ishte rreth 12 kilometra në lindje të Leptokarisë në rajonin e Thesprotisë, ndërsa thellësia e tij ishte rreth 12.9 kilometra.
Vetëm katër minuta më pas, në të njëjtën zonë u regjistrua edhe një pasgoditje me magnitudë 4.7, rreth 20 kilometra nga qyteti i Janinës dhe pranë kufirit me Shqipërinë.
Lëkundjet u ndjenë mjaft fort në Ishujt Jonianë si edhe në disa zona të Thesalisë.
Profesori i sizmologjisë Efthimios Lekkas, në një deklaratë për median publike greke ERT, tha se të dhënat paraprake tregojnë për një tërmet relativisht të fortë, i cili ka ndodhur në një thellësi të vogël. Ai theksoi se zona njihet për aktivitet sizmik dhe se tërmete të kësaj magnitude zakonisht ndodhin pa paralajmërim.
Deri më tani nuk raportohet për dëme materiale apo persona të lënduar.
