Një tentativë vjedhjeje është regjistruar gjatë orëve të natës në qytetin e Pogradecit, ku persona të paidentifikuar kanë synuar të grabisin një argjendari në lagjen nr. 3.
Sipas informacioneve paraprake, tre persona të maskuar kanë tentuar të hapin me forcë qepenin e biznesit, duke arritur ta ngrenë atë deri në një hapësirë të mjaftueshme për të hyrë.
Më pas, ata kanë thyer xhamin e derës kryesore, por në momentin që po përpiqeshin të futeshin në ambientet e brendshme, kanë konstatuar afrimin e një patrulle policie dhe janë larguar menjëherë nga vendngjarja.
Ngjarja ka ndodhur në rrugën “Kajo Karafili”, një nga akset kryesore të qytetit të Pogradecit, ku operojnë dhjetëra biznese, përfshirë edhe disa argjendari.
Policia ka nisur hetimet për identifikimin dhe kapjen e autorëve, ndërsa janë sekuestruar pamjet e kamerave të sigurisë nga bizneset përreth, të cilat pritet të ndihmojnë në zbardhjen e plotë të rastit.
Ndërkohë, pronari i argjendarisë shprehet i shqetësuar për sigurinë, duke theksuar se kjo është hera e tretë që biznesi i tij bëhet objekt i vjedhjes.
“Është hera e tretë që më vjedhin. Këtë herë nuk arritën të marrin gjë, pasi i trembi sistemi i alarmit. Ishin tre persona të maskuar. Unë kam besim vetëm tek mediat, jo tek policia. Edhe dy rastet e mëparshme nuk janë zbardhur. Shpresoj që këtë herë të ketë drejtësi. Kam pësuar më parë rreth 15 mijë euro dëm. Kemi frikë, nuk mund të punojmë të qetë,” u shpreh ai.
Hetimet vijojnë, ndërsa pritet që pamjet filmike të ndihmojnë në identifikimin e autorëve.
