Një incident i rëndë ka ngritur shqetësime pak ditë para mbërritjes së Kombëtares së Anglisë në Kansas City për Kupën e Botës 2026.
Sipas policisë lokale, të shtëna me armë janë regjistruar rreth orës 04:00 në Troost Avenue, pranë zonës ku pritet të qëndrojë skuadra angleze gjatë fazës së grupeve. Nga ngjarja kanë mbetur të plagosur 9 persona.
Fillimisht u raportua për tre gra të dërguara në spital, por më pas autoritetet konfirmuan se në total 9 të rritur kishin nevojë për ndihmë mjekësore. Fatmirësisht, plagët nuk konsiderohen kërcënuese për jetën.
Deri tani nuk ka persona të arrestuar, ndërsa policia po vijon hetimet dhe ka shtuar patrullimet në zonë.
Ngjarja ka marrë vëmendje të veçantë pasi ndodhi rreth 6 kilometra larg qendrës stërvitore dhe hotelit ku Anglia do të jetë e vendosur gjatë Botërorit.
