Çdo ditë, autobusë, tragete dhe avionë mbushen me shqiptarë që largohen nga vendi në kërkim të një jete më të mirë.
Të rinjtë po ikin, qytetet po boshatisen dhe shumë biznese po përballen me mungesën e fuqisë punëtore. Por, ndërsa shqiptarët largohen, në Shqipëri po mbërrijnë të huaj për të punuar e jetuar. Në një biznes fason në Gjirokastër, rreth 50 vajza nga Mianmar kane nisur një jetë të re larg familjeve të tyre.
Ten Ten dhe Ina tregojnë për Top Channel se fillimisht e njohën Shqipërinë në Ksamil, ku kishin ardhur për punë sezonale, pa e menduar se pak muaj më vonë do të jetonin në jug të vendit me kontrata të rregullta pune. Nga një vend krejtësisht i panjohur për to, Shqipëria u kthye në mundësinë për të siguruar të ardhura dhe një të ardhme më të mirë.
“Unë jam Ten Ten. Fillimisht isha në Ksamil ku punova një sezon. Më pas erdhëm këtu. Jam shumë e lumtur që jam në Shqipëri. Punojmë dhe jetojmë në kushte shumë të mira dhe kemi gjetur një shtëpi të dytë. Kontrata ime përfundon pas dy vitesh dhe më pas do të kthehem pranë familjes sime. Nuk kisha dëgjuar më parë për Shqipërinë dhe në fillim kisha frikë, por tani e dua këtë vend. Në Mianmar kam lënë familjen time dhe jam larguar për shkak të pamundësive ekonomike”,shprehet ajo.
Ndërsa Inna thotë se tashmë e sheh Shqipërinë si vendin ku dëshiron të ndërtojë jetën e saj: “Kam një kontratë 5-vjeçare këtu. Më pëlqen shumë Gjirokastra, kemi gjetur njerëz të dashur dhe mikpritës. Dua të qëndroj këtu, nuk dua të largohem”.
Ky është paradoksi i kohës që po jeton vendi: një Shqipëri që po humbet bijtë e saj, por që po hap dyert për punëtorë të ardhur nga mijëra kilometra larg./TCh
