Drejtoria e Përgjithshme e Burgjeve ka ushtruar një kontroll të befasishëm në qelitë e burgut të Durrësit, aty ku edhe vuajnë dënimin politikane dhe zyrtarë.
Si rezultat i kontrolleve u sekuestruan tre celularë tip “iPhone”, të ndezur dhe funksionalë, ku njëri prej tyre u gjet në posedim të të paraburgosurit, Behar Gurguri.
Ndërsa dy të tjerë, së bashku me një palë kufje “bluetooth”, u konstatuan pa autorë në ambientet e institucionit.
Njoftimi i drejtorisë së Burgjeve:
Stop sendeve të ndaluara në IEVP Durrës
Në vijim të informacioneve të siguruara nga strukturat operative të IEVP Durrës dhe pas analizës së riskut, Drejtoria e Përgjithshme e Burgjeve ndërmori një aksion të befasishëm kontrolli në këtë institucion.
Kontrolli u zhvillua në orët e para të mëngjesit, në zbatim të Urdhrit Nr. 626, datë 07.04.2026, me pjesëmarrjen e Forcave Speciale të DPB.
Gjatë operacionit u ushtrua kontroll në ambientet e brendshme dhe të jashtme të institucionit.
U sekuestruan tre celularë tip “iPhone”, të ndezur dhe funksionalë.
Njëri prej tyre u gjet në posedim të të paraburgosurit me iniciale B.G.
Dy të tjerë, së bashku me një palë kufje “bluetooth”, u konstatuan pa autorë në ambientet e institucionit.
U veçua i paraburgosuri B.G.
U hartua raporti i incidentit.
U mbajt procesverbali i bllokimit të sendeve të ndaluara.
Materialet iu referuan Specialistit të SHKB për veprime të mëtejshme hetimore.
Ky aksion është një tjetër dëshmi e vendosmërisë për të goditur çdo tentativë për cenimin e sigurisë në institucionet penitenciare.
Kontrollet do të vijojnë me intensitet të lartë në të gjitha IEVP-të në rang vendi. Zero tolerancë ndaj shkelësve.
