Një vizitë “e shpejtë” në supermarket shpesh përfundon me një karrocë plot dhe kjo nuk ndodh rastësisht. Ekspertët tregojnë se supermarketet përdorin taktika të menduara mirë për të ndikuar te mënyra si konsumatorët shpenzojnë, shpesh pa e kuptuar fare.
Nga ofertat me ulje të mëdha çmimesh, te produktet e vendosura në nivelin e syve apo tundimet pranë kasës, çdo detaj është menduar për të nxitur blerjet impulsive. Sipas specialistëve, edhe karrocat e mëdha krijojnë iluzionin se ke blerë pak, ndërsa blerjet kur je i uritur rrisin ndjeshëm gjasat për shpenzime të panevojshme.
Ekspertët këshillojnë që konsumatorët të kontrollojnë gjithmonë çmimin për njësi, të mos joshen vetëm nga ofertat, të përdorin lista blerjesh dhe të shmangin supermarketin kur janë të uritur.
Një tjetër truk i zakonshëm është vendosja e produkteve më të shtrenjta në raftet që bien direkt në sy, ndërsa alternativat më ekonomike vendosen më lart ose më poshtë. Për këtë arsye, këshillohet të kontrollohen të gjitha raftet para se të merret një vendim blerjeje.
