Mëngjesin e kësaj të mërkure, kreu i Prokurorisë së Posaçme Klodjan Braho, ka pritur në një takim zyrtar ministren e Drejtësisë së Austrisë, Anna Soprrer.
Siç shihet dhe në pamjet e mëposhtme, Braho e priti politikanen austriake në shkallët e institucionit që ai drejton, ku pasi shtrënguan duart vijuan bisedën në ambientet e brendshme të godinës.
Ky zhvillim vjen në një moment të rëndësishëm për marrëdhëniet mes drejtësisë shqiptare dhe asaj austriake, të cilat kanë intensifikuar ndjeshëm bashkëpunimin e tyre në luftën kundër krimit ndërkufitar.
Vetëm pak javë më parë, autoritetet e të dy vendeve realizuan një operacion të përbashkët, duke çmontuar një rrjet të sofistikuar call center-ash mashtruese, të cilat zhvasnin shtetas austriakë përmes skemave të mashtrimit.
Sakaq theksojmë se Prokuroria e Posaçme prej vitesh tanimë konsiderohet gjerësisht si një nga isntitucionet kyçe në përpjekjet për konsolidimin e shtetit ligjor në vendin tonë, duke gëzuar mbështetje të konsiderueshme ndërkombëtare për angazhimin e tij në luftën kundër korrupsionit dhe krimit të organizuar.
