Të paktën gjashtë persona janë vrarë dhe 20 të tjerë janë plagosur si pasojë e sulmeve ruse në disa rajone të Ukrainës, njoftoi të premten Ministria e Jashtme e Ukrainës.
Sipas ministrisë, në rajonin juglindor të Zaporizhzhia Oblast, sulmet shkaktuan një zjarr në një pikë karburanti, duke dëmtuar një ndërtesë dhe pajisje të tjera, ndërsa dy persona mbetën të plagosur.
Në Kharkiv Oblast, sulmet ajrore dëmtuan një depo, ndërtesa banimi dhe automjete. Si pasojë, 10 persona, përfshirë katër fëmijë, u plagosën, ndërsa një person humbi jetën.
Ndërkohë, në Dnipropetrovsk Oblast, sulmet dëmtuan banesa private, një zyrë postare dhe automjete. Një vajzë 8-vjeçare u vra në Pavlohrad, ndërsa një person tjetër u plagos.
Në rajonin jugor të Odesa Oblast, sulmet ruse shkaktuan zjarr në dy cisterna karburanti dhe një cisternë gazi. Një person u vra dhe katër të tjerë u plagosën. Ministria tha se operacionet e zjarrfikësve u vështirësuan nga alarmet e përsëritura për sulme ajrore.
Po ashtu, në Kramatorsk, në rajonin lindor të Donetsk Oblast, tre persona humbën jetën dhe të paktën gjashtë të tjerë u plagosën.
“Rusia nuk ka ndërmend të ndalet”, deklaroi Ministria e Jashtme e Ukrainës, duke u bërë thirrje partnerëve ndërkombëtarë të vendosin sanksione më të ashpra ndaj Moskës.
Ministria theksoi gjithashtu se forcimi i mbrojtjes ajrore të Ukrainës mbetet thelbësor për mbrojtjen e civilëve dhe përballimin e sulmeve të vazhdueshme ajrore.
