Kryeministri Edi Rama deklaroi sot nga Lezha se Partia Socialiste nuk i është përgjigjur asnjëherë sulmeve politike me të njëjtën mënyrë, duke theksuar se nuk ka përdorur “rrugët e hakmarrjes” gjatë ushtrimit të pushtetit. Rama tha se mazhoranca ka zgjedhur të mos kthejë “baltën” që, sipas tij, është hedhur ndaj saj dhe familjarëve të saj.
Duke folur në 35-vjetorin e PS-së në Lezhë, tha se ai dhe bashkëpunëtorët e tij nuk kanë reaguar me të njëjtën gjuhë ndaj kundërshtarëve. Rama theksoi se sulmet ndaj familjes dhe jetës private nuk i përkasin standardeve evropiane dhe se kjo sjellje, sipas tij, e dallon mazhorancën nga kundërshtarët politikë.
Rama: Ne nuk ia kemi kthyer asnjëherë kusurin atyre të tjerëve, nuk kemi kërkuar rrugët e hakmarrjes duke shfrytëzuar pushtetin, por edhe kemi pranuar baltën që na ka sjellë çdo ditë furtuna që është ngritur kundër nesh. Baltë ndaj nesh, baltë ndaj familjes sonë, baltë ndaj fëmijëve tonë. Keni parë ndonjëherë që nga unë dhe të tjerët me radhë, që t’i kthehemi atyre duke përdorur librin e tyre të shtëpisë? Kurrë! Asnjëherë. Nuk kanë lënë gjë pa thënë për familjen time, njerëzit e mi, fëmijët e mi, për të vdekurit në familjen time. Kurrë s’më keni dëgjuar të flas dhe nuk do të flas për familjet e tyre. Kjo nuk është evropiane, nuk është njerëzore. Është njerzillëku që na bën ne alternativën më të mirë të shqiptarëve.
