Të paktën 14 persona kanë humbur jetën dhe 121 të tjerë janë plagosur nga një sulm me dronë rusë ndaj një qendre tregtare në qytetin ukrainas të Kryvyi Rih.
Sulmi ndodhi gjatë ditës dhe u krye në dy faza. Sipas autoriteteve ukrainase, një dron goditi fillimisht qendrën tregtare, ndërsa rreth 30 minuta më vonë, një tjetër dron goditi të njëjtën zonë, në kohën kur ekipet e emergjencës kishin mbërritur për të ndihmuar të plagosurit. Presidenti ukrainas Volodymyr Zelensky e cilësoi atë si një sulm “cinik dhe të neveritshëm”.
Mes të plagosurve janë 22 fëmijë, ndërsa 29 persona, përfshirë pesë fëmijë, ndodhen në gjendje të rëndë. Sulmi shkaktoi gjithashtu zjarr dhe dëme të mëdha në qendrën tregtare.
Kryvyi Rih është qyteti i lindjes së presidentit ukrainas Zelensky dhe ka qenë vazhdimisht objektiv i sulmeve ruse gjatë luftës.
