Kryeministri i Finlandës, Petteri Orpo, dhe homologu i tij suedez, Ulf Kristersson, kanë kërkuar nga Kryetarja e Komisionit Evropian, Ursula von der Leyen, të lejojë që vendet e tyre të përfitojnë nga fleksibilitetet nën rregullat e BE-së për pyjet, për të mbrojtur industrinë e tyre për avancimin në bioenergji.
Sipas rregullave të BE-së, biomasa e pyjeve — përfshirë drurët që përdoren për energji — mund të klasifikohet si e rinovueshme dhe e qëndrueshme, vetëm nëse shteti anëtar tregon se shfrytëzimi i përgjithshëm i pyjeve është i qëndrueshëm. Megjithatë, intensiviteti i lartë i shfrytëzimit dhe ndikimi i zjarreve në veri të Evropës minojnë mundësinë e kualifikimit si “i qëndrueshëm”.
Ligji për përdorimin e tokës, ndryshimin e përdorimit të tokës dhe pylltarinë (LULUCF), në fuqi që nga viti 2018, përcakton objektiva të detyrueshme për heqjen e karbonit për periudhën 2026-2030 dhe kërkon nga çdo vend të BE-së që të sigurojë se tokat dhe pyjet e tij nuk bëhen një burim neto i emetimeve.
Ndërsa biokarburantet mund të ofrojnë reduktime në emetime krahasuar me fosilet, ndikimi i përgjithshëm varet nga faktorë të tillë si prodhimi i lëndëve të para, metodat e përpunimit dhe vendimet politike.
Rritja e prerjeve është identifikuar si një arsye kryesore për kalimin e pyjeve nga një rezervuar karboni në një burim, sipas Institutit të Burimeve Natyrore të Finlandës (LUKE) dhe Universitetit Suedez të Shkencave Bujqësore (SLU).
Finlanda dhe Suedia, të njohura për varësinë e tyre nga biomasa e pyjeve, historikisht e kanë përdorur këtë prodhim për të përmbushur objektivat e energjisë rinovueshme.
Megjithatë, liderët e këtyre vendeve shprehën në një letër të përbashkët se rregullat e pyjeve të BE-së përbëjnë një “problem të madh” dhe diktojnë kufizime të “pakuptimta dhe të padrejta” për pylltarisë suedeze dhe finlandeze.
Sipas Kelsey Perlman nga NGO-ja Fern, në Finlandë, prerja e druve ka qenë kaq intensive sa që për të paktën pesë vitet e fundit, sektori i pylltarisë ka emetuar më shumë gazra serë sesa sa mund të kapin pyjet e mbetura.
