Shpesh mund të keni dëgjuar se mushkonjat pickojnë njerëzit “me gjakun e ëmbël”, por për këtë shkenca tashmë ofron një shpjegim.
Një studim ndërkombëtar i publikuar në revistën Global Ecology and Biogeography tregon se mushkonjat nuk kanë preferenca fikse, por përshtaten në mënyrë shumë fleksibël në zgjedhjen e ushqimit.
Ekipi i udhëhequr nga biologu Konstans Wells, nga Universiteti i Swansea në Uells, analizoi mbi 15.600 vakte gjaku të mushkonjave përmes teknikave molekulare, duke krijuar kështu një hartë të gjerë globale mbi zakonet ushqimore të gjashtë specieve kryesore me ndikim shëndetësor.
Rezultatet treguan dallime të qarta: Culex, mushkonja e zakonshme, ushqehet me një gamë shumë të gjerë prej 179–321 llojesh, nga shpendët te gjitarët, reptilët e amfibët. Aedes, ku bën pjesë edhe mushkonja tigër, është më selektive, duke preferuar 26–65 lloje. Ndërkohë, Anopheles, që transmeton malarien, ka spektrin më të ngushtë, me vetëm 7–29 lloje.
Sipas studimit, Aedes dhe Anopheles kanë një prirje të veçantë ndaj njeriut, çka i bën ato një rrezik serioz për shëndetin publik në zonat urbane, ndërsa disa lloje të tjera tërhiqen më shumë nga bagëtitë apo shpendët.
Ky është studimi i parë që përdor në shkallë kaq të gjerë metoda gjenetike për analizimin e zakoneve ushqyese të mushkonjave, duke përfaqësuar një hap të madh përpara në monitorimin dhe parandalimin global të sëmundjeve që ato transmetojnë.
