Një studim i ri i kryer në SHBA dhe publikuar në revistën “Alzheimer’s & Dementia” ka zbuluar se personat e pamartuar kanë një rrezik më të ulët për të zhvilluar demencë krahasuar me bashkëmoshatarët e tyre të martuar.
Studimi përfshiu mbi 24,000 individë të moshës nga 50 deri në 104 vjeç dhe u ndoq për një periudhë prej 18 vitesh, gjatë së cilës pjesëmarrësit iu nënshtruan testeve të vazhdueshme neuropsikologjike. U vu re se ata që nuk ishin të martuar, edhe kur shfaqnin shenja të hershme të deficitit njohës, rrallë zhvillonin demencë të plotë.
Për të forcuar rezultatet, studiuesit analizuan edhe faktorë të tjerë ndikues si mosha, gjinia, arsimi, gjendja fizike dhe ajo mendore. Sipas tyre, personat e martuar shpesh përballen me një jetë më të strukturuar dhe më pak të larmishme, duke u ekspozuar ndaj më pak stimujsh mendorë.
Kjo rutinë në çift mund të ndikojë negativisht në gjallërinë e trurit dhe të përshpejtojë rënien njohëse. Ndërkohë, individët beqarë janë në përgjithësi më të pavarur dhe më aktivë, çka ndihmon në ruajtjen e funksioneve mendore.
Sidoqoftë, studiuesit theksojnë se këto të dhëna nuk janë përfundimtare. Studime të mëparshme kanë treguar se martesa mund të ofrojë mbrojtje përmes mbështetjes emocionale dhe ndërveprimit të përditshëm me partnerin.
Autorët e studimit sugjerojnë se një jetë aktive shoqërore dhe më pak rutinore mund të jetë çelësi për një tru të shëndetshëm.
